Թուրքիայի խորհրդարանի նախագահը հույս է հայտնել, որ շուտով կհայտարարվի Հայաստան–Ադրբեջան հարաբերությունների կարգավորման մասին

Ֆինլանդիայում գտնվող Թուրքիայի խորհրդարանի նախագահ Նուման Քուրթուլմուշը Ֆինլանդիա-Թուրքիա միջխորհրդարանական բարեկամության խմբի հովանու ներքո կազմակերպված «Փոփոխվող աշխարհում Թուրքիան՝ որպես գործընկեր, հավասարակշռող և ռազմավարական դերակատար» թեմայով համաժողովին ունեցած ելույթում անդրադարձել է Հայաստան-Ադրբեջան կարգավորման գործընթացին, հայտնում են թուրքական ԶԼՄ–ները։

Քուրթուլմուշը, նշելով, որ Հարավային Կովկասում Ադրբեջանի և Հայաստանի միջև հակամարտությունն արդեն անցյալում է, հայտարարել է.

«Ադրբեջանն ու Հայաստանը մտել են համաձայնության որոշակի ուղի, և Թուրքիան չափազանց լուրջ աջակցություն է ցուցաբերում այս գործընթացին: Հույս ունեմ, որ շատ կարճ ժամանակում մենք աշխարհին կհայտնենք Ադրբեջանի և Հայաստանի հարաբերությունների կարգավորման մասին լուրեր։ Այսպիսով, մեր տարածաշրջանում, որտեղ նախկինում եղել են հակամարտություններ և լարվածություններ, այդ լարված վիճակը կլուծվի, և կշարունակվեն քայլեր, որոնք կբխեն բոլոր երեք երկրների շահերից»: