TRIPP–ի շինարարության փուլում 3–րդ գործընկերների կարիքն ենք ունենալու. Միրզոյան

 «Թրամփի ուղի» նախագծի շինարարության փուլում Հայաստանը 3–րդ գործընկերների կարիքն է ունենալու, Էստոնիայի ԱԳ նախարար Մարգուս Ցահքնայի հետ համատեղ մամուլի ասուլիսի ժամանակ ասել է ՀՀ ԱԳ նախարար Արարատ Միրզոյանը` անդրադառնալով ԱՄՆ պետդեպարտամենտի այն հայտարարությանը, որ «Թրամփի ուղի» նախագիծը շարունակում է մնալ իրենց գլխավոր առաջնահերթություններից մեկը, և Հայաստանը ԱՄՆ–ի և համաձայնեցված 3–րդ երկրների հետ աշխատում է այս նախագծի իրականացման ուղղությամբ։

Նրա խոսքով՝ Հայաստանի և ԱՄՆ-ի միջև երկկողմ աշխատանքները TRIPP–ի իրագործման ուղղությամբ ինտենսիվ շարունակվում են, հիմա դեռևս աշխատանքների փաստաթղթերի և, ըստ էության, միջպետական համաձայնագրի համաձայնեցման փուլում են։

 

Միրզոյաննն ավելացրեց, որ գաղտնիք չէ` TRIPP–ը որքան էլ որ երկկողմ նախագիծ է, այն բխում է բազմաթիվ երկրների շահերից` սկսած Չինաստանից, վերջացրած Պորտուգալիայով։

«Այս նախագիծը հո այլ մոլորակի վրա չէ՞. նրա մի ծայրը պետք է կպնի Ադրբեջանին, իսկ մյուս ծայրն ավարտվի Նախիջևանում, սակայն տրամաբանական շարունակությունը հայկական երկաթուղիների ցանցն է դեպի Թուրքիա, Կենտրոնական Ասիայի երկրներ»,– ասաց ՀՀ ԱԳ նախարարը։

 

Նա ևս մեկ անգամ հիշեցրեց, որ TRIPP–ով հետաքրքրված են նաև Մերձավոր Արևելքի երկրները։