TRIPP նախագիծը նոր հնարավորություններ կստեղծի Իրանի և Ռուսաստանի համար.Արարատ Միրզոյան

Լրագրողների հետ հանդիպման ընթացքում ՀՀ ԱԳ նախարար Արարատ Միրզոյանը անդրադարձել է այն հարցին, թե TRIPP-ն անվտանգային խնդիրներ կարող է ստեղծել Իրանի համար։

Միրզոյանն ասել է, որ Հայաստանի տարածքում իրականացվելիք TRIPP նախագիծը հնարավորություններ կստեղծի նաև Իրանի Իսլամական Հանրապետության համար:

«Իրանում կային հարցեր TRIPP-ի ենթադրյալ անվտանգային բաղադրիչի վերաբերյալ, քննարկվում էր երրորդ կողմի զինված ուժերի տեղակայման հարց, Իրանի մեր գործընկերները տեսել են, որ որևէ նման բան չի նախատեսվում ստորագրված փաստաթղթով, բոլոր ենթակառուցվածքները լինելու են ՀՀ ինքնիշխանության ներքո, գործելու են ՀՀ իրավազորության ներքո և դա բացառում է նաև երրորդ կողմի տեղակայումը։ Այդ հարցերի շուրջ առանձնապես անհանգստանալու տեղ չկա։ Նույն Իրանի համար, նույն TRIPP-ը հնարավորություններ է բերելու։ Չէ որ Նախիջևանից մենք ենք կապվելու երկաթուղով Իրանի երկաթուղային ցանցի հետ։ Մեր միջոցով նաև Իրանն է կարողանալու դուրս գալ, օրինակ՝ Սև ծով։ Ստացվում է, որ TRIPP-ով Պարսից ծոց-Սև ծով երկաթուղային նոր կապ է ստեղծվում»,- ասաց Միրզոյանը։

Հայաստանի արտաքին գործերի նախարարը հավելեց՝ TRIPP-ը հնարավորություններ կստեղծի նաև Ռուսաստանի Դաշնության համար։

«Ռուսաստանից բազմաթիվ պաշտոնյաներ հետաքրքրություն են ցուցաբերում TRIPP-ի վերաբերյալ, մասնակցություն են ցանկանում ունենալ»,- նշել է  Արարատ Միրզոյանը։