Վենետիկում քննարկվել են հայկական արտադրանքի եվրոպական շուկաներ մուտքի հնարավորությունները

Իտալիայում 🇮🇹 Հայաստանի 🇦🇲 դեսպանության փոխանցմամբ՝ հուլիսի 20-ին Վենետիկում ՀՀ պատվավոր հյուպատոսարանում տեղի է ունեցել աշխատանքային հանդիպում՝ նվիրված հայկական ձեռնարկությունների եվրոպական շուկաներ մուտքի խթանմանը։

Հանդիպմանը մասնակցել են ՀՀ էկոնոմիկայի նախարարի տեղակալ Անուշիկ Ավետյանը, Իտալիայում ՀՀ դեսպան Վլադիմիր Կարապետյանը, «Ներդրումների աջակցման կենտրոն» հիմնադրամի տնօրեն Գոհար Աբաջյանը, ԿՈՆՖԱՊԻ Վենետիկի գործարարների միության նախագահ Մարկո Զեկկինելին, գլխավոր տնօրեն Նիկոլա Զանոնն ու կառավարման խորհրդի անդամները։

Քննարկվել են Հայաստան-Իտալիա տնտեսական համագործակցության ընդլայնման հեռանկարները, մտքեր ու փորձ են փոխանակվել տարբեր ոլորտներում հայկական արտադրանքի եվրոպական շուկաներում առաջխաղացման, առևտրատնտեսական կապերի ամրապնդման և նոր գործարար հնարավորությունների ստեղծման շուրջ։

Այնուհետև պատվիրակությանն ընդունել է Վենետիկի պրեֆեկտ Դարկո Պելլոսը։ Հանդիպման ընթացքում ընդգծվել է Հայաստանի և Իտալիայի միջև տնտեսական ու ինստիտուցիոնալ համագործակցության հետագա զարգացման կարևորությունը։