Վլադիմիր Զելենսկին շնորհավորել է Իլհամ Ալիևին

Ուկրաինայի նախագահ Վլադիմիր Զելենսկին շնորհավորական նամակ է հղել Ադրբեջանի նախագահ Իլհամ Ալիևին՝ երկրի Անկախության օրվա առթիվ։ Այս մասին հայտնում է Ադրբեջանի նախագահի պաշտոնական կայքը։

Իր ուղերձում Զելենսկին շեշտել է, որ Ուկրաինան անփոփոխ կերպով աջակցում է պետությունների ինքնիշխանությանը, անկախությանը և տարածքային ամբողջականությանը՝ միջազգայնորեն ճանաչված սահմաններում։ Նրա համոզմամբ՝ այս սկզբունքներին հավատարմությունն այսուհետ ևս կմնա Սև ծով-Կասպից ծով տարածաշրջանում կայունության և անվտանգության հիմքը։

Ուկրաինայի ղեկավարը վստահություն է հայտնել, որ երկու երկրների միջև էներգետիկայի, լոգիստիկայի, տրանսպորտային կապերի, ենթակառուցվածքների և անվտանգության ոլորտներում համագործակցության հետագա զարգացման մեծ պոտենցիալ կա.

«Գլոբալ էներգետիկ և լոգիստիկ երթուղիների տրանսֆորմացիայի պայմաններում մեր պետությունների դերն ու կայունությունը տարածաշրջանային փոխգործակցության ապահովման գործում էլ ավելի կմեծանա։ Հավատում եմ, որ Ադրբեջանի և Ուկրաինայի միջև ռազմավարական գործընկերությունն այսուհետ ևս կամրապնդվի՝ ի շահ մեր պետությունների և ժողովուրդների»,- ասված է նամակում։