Վրաստանի ԱԳ նախարար․ Հարավային Կովկասի աշխարհաքաղաքական նշանակությունը Եվրոպայի համար փոխվել է

Վրաստանի արտաքին գործերի նախարար Մակա Բոճորիշվիլին «Ռուսթավի 2»-ի եթերում հայտարարել է, որ Հարավային Կովկասի աշխարհաքաղաքական նշանակությունը Եվրոպայի համար սկզբունքորեն փոխվել է, այս մասին հայտնում են վրացական լրատվամիջոցները։

«Կարելի է ասել, որ Հարավային Կովկասին և տարածաշրջանի հետ հարաբերություններին նոր իմաստ է հաղորդվում: Անխուսափելի է տեսնել, թե ինչպիսի նշանակություն ունի այս տարածաշրջանը Եվրամիության համար: Եթե նախկինում մոտեցումներն այլ էին, ապա այսօր պարզ է՝ սա մի տարածաշրջան է, որը Եվրամիության անվտանգության ու բարեկեցության գրավականն է: Այս համատեքստում բոլորովին այլ կշիռ են ստանում հարաբերությունները Հայաստանի, Վրաստանի և Ադրբեջանի հետ:»,– ասել է Վրաստանի արտգործնախարարը։

Նա հույս է հայտնել, որ Եվրամիության հետ քննարկումները Հարավային Կովկասի երկրների վերաբերյալ կընթանան ռացիոնալ շրջանակներում և կլինեն ավելի իրատեսական մոտեցումների վրա հիմնված։