Վրաստանի իշխանությունները պատրաստվում են Ռուսաստանի հետ դիվանագիտական հարաբերությունների վերականգնմանը․Սաակաշվիլի

Ռուսական լրատվամիջոցները գրում են, որ Վրաստանի նախկին նախագահ Միխեիլ Սաակաշվիլին հայտարարել է, որ երկրի իշխանությունները,  պատրաստվում են Ռուսաստանի հետ դիվանագիտական հարաբերությունների վերականգնմանը։ Այս մասին նա գրել է սոցիալական ցանցերում։

Վրաստանի նախկին նախագահը  զգուշացրել է, որ Աբխազիա վառելիքի վերջին մատակարարումները կարող են լինել Վրաստանի և Ռուսաստանի միջև խոշոր քաղաքական համաձայնագրի նախապատրաստման նշան։

«Վրացական իշխանությունները ծրագրում են համաձայնագիր ստորագրել Ռուսաստանի հետ,վերականգնել դիվանագիտական հարաբերությունները և ստեղծել հակաարևմտյան դաշինք, ինչպես նաև ուժի չկիրառման մասին համաձայնագիր ստորագրել Աբխազիայի և Ցխինվալիի իշխանությունների հետ»,- գրել է Սաակաշվիլին։

Նա վստահություն է հայտնել, որ Վրաստանը նույնպես կընդունի չեզոքության հռչակագիրը։

Ավելի վաղ վարչապետ Իրակլի Կոբախիձեն հայտարարել էր, որ Վրաստանի և Ռուսաստանի միջև դիվանագիտական ​​հարաբերությունների վերականգնումը անհնար է, քանի դեռ Մոսկվան ճանաչում է Աբխազիայի և Հարավային Օսիայի անկախությունը։ Կոբախիձեն նաև ընդգծել է, որ Վրաստանի դիրքորոշումն այս հարցում անփոփոխ է մնում, և Թբիլիսին չի ճանաչում Աբխազիայի և Հարավային Օսիայի ինքնիշխանությունն ու տարածքային ամբողջականությունը։