Վրաստանը հաստատել է իր աջակցությունը Հայաստանի տարածքային ամբողջականության և ինքնիշխանության նկատմամբ։

Պաշտոնական այցով Վրաստանում գտնվող ՀՀ պաշտպանության նախարար Սուրեն Պապիկյանին ընդունել է Վրաստանի փոխվարչապետ, պաշտպանության նախարար Իրակլի Չիքովանին: Այս մասին տեղեկանում ենք Վրաստանի Պաշտպանության նախարարությունից: Հանդիպումը շարունակվել է պատվիրակությունների ընդլայնված կազմով։ 

Հանդիպման ընթացքում քննարկվել են պաշտպանության բնագավառում երկկողմ համագործակցության ընթացքին և զարգացման հեռանկարներին վերաբերող հարցեր։

Կողմերն անդրադարձել են նաև տարածաշրջանային անվտանգությանն առնչվող մի շարք հարցերի։ Ըստ Վրաստանի ՊՆ-ի՝ Չիքովանին շնորհակալություն է հայտնել հայկական կողմին Վրաստանի տարածքային ամբողջականության և ինքնիշխանության աջակցության համար և հաստատել Վրաստանի աջակցությունը Հայաստանի տարածքային ամբողջականության և ինքնիշխանության նկատմամբ։

Հանդիպումից հետո ՀՀ պաշտպանության նախարարը հարգանքի տուրք է մատուցել Վրաստանի տարածքային ամբողջականության համար մղված մարտական ​​գործողություններում զոհվածների հիշատակին՝ Հերոսների հուշահամալիրում։ Այցի շրջանակներում Սուրեն Պապիկյանն այցելելու է նաև Ծերովանիում  տեղակայված Մարո Մակաշվիլիի անվան զինծառայողների վերականգնողական կենտրոն։