Վրաստանի ՊԱԾ պետն ու ՀՀ դեսպանը քննարկել են տարածաշրջանային անվտանգության մարտահրավերները

Վրաստանի Պետական ​​անվտանգության ծառայության (ՊԱԾ) պետ Գեկա Գելաձեն հանդիպում է ունեցել Վրաստանում Հայաստանի Հանրապետության արտակարգ և լիազոր դեսպան Աշոտ Սմբատյանի հետ, հայտնում են վրացական ԶԼՄ-ները:

Հանդիպման ընթացքում կողմերը հանգամանալից անդրադարձ են կատարել երկու երկրների միջև հաստատված ռազմավարական գործընկերության օրակարգային հարցերին։

Զրույցի առանցքային թեմաներից են եղել տարածաշրջանում ընթացող արդի գործընթացները և անվտանգային միջավայրին առնչվող հիմնական մարտահրավերները։

«Վրաստանի և Հայաստանի անվտանգության ծառայությունների միջև առկա է ամուր համագործակցություն, որի կարևորությունն անգնահատելի է տարածաշրջանային կայունության համար։ Վրացական կողմը պատրաստակամ է էլ ավելի խորացնելու և ընդլայնելու այս գործընկերությունը»։

Կողմերը վերահաստատել են անվտանգության ոլորտում համատեղ ջանքերի մեկտեղման և երկկողմ փոխգործակցության ակտիվացման անհրաժեշտությունը՝ ի նպաստ երկու պետությունների կայուն զարգացման։