622,000 դոլար՝ ԱԺ գաղտնի նիստի տեղեկությունների դիմաց. Պետական դավաճանության դեպք

Հայաստանում պետական դավաճանության և լրտեսության հերթական աղմկահարույց դեպքն է բացահայտվել։ Քննչական կոմիտեի խոսնակի փոխանցմամբ՝ նախաձեռնվել է քրեական վարույթ:

Ըստ գործի նյութերի՝ Ա.Թ.-ն 2024 թվականին հավաքագրվել է օտարերկրյա հատուկ ծառայությունների կողմից։ Նա «Ռուսսիա Կովկաս» աշխարհաքաղաքական կենտրոնի տնօրենի (ով հանդիսանում է օտարերկրյա հատուկ ծառայության ներկայացուցիչ) հանձնարարությամբ կատարել է լրտեսություն։

Մասնավորապես՝ Ա.Թ.-ն ապօրինի հավաքել և առանձնապես խոշոր չափերի՝ 622 հազար ԱՄՆ դոլարի դիմաց օտարերկրյա գործակալին է փոխանցել պետական գաղտնիք հանդիսացող տեղեկություններ։ Խոսքը 2024 թվականի ապրիլին Ազգային ժողովի փակ, գաղտնի նիստում կայացած լսումների ընթացքի և արդյունքների մասին է, որոնք թարգմանվել են ռուսերեն ու փոխանցվել պատվիրատուին։