800-ից ավելի հայտ է ներկայացվել. Փաշինյանը՝ 200 լավագույն բուհերի շրջանավարտներին գործադիրում աշխատանքի հրավիրելու մասին

Հայաստանի Հանրապետության կառավարությունում աշխատանքի անցնելու նպատակով արդեն իսկ ստացվել է 800-ից ավելի հայտ։ Այս մասին կառավարության հերթական ճեպազրույցի ժամանակ հայտարարեց վարչապետ Նիկոլ Փաշինյանը՝ պատասխանելով լրագրողի այն հարցին, թե ինչպիսի՞ արձագանք է գրանցել աշխարհի 200 լավագույն բուհերի ուսանողներին ու շրջանավարտներին ուղղված իր հրավերը և ովքե՞ր են հիմնական դիմողները։

Գործադիրի ղեկավարի փոխանցմամբ՝ դիմումատուների գերակշիռ մասը հայեր և ՀՀ քաղաքացիներ են, սակայն հետաքրքրվածների թվում կան նաև օտարերկրացիներ։

«Այս պահին քննարկվում է, որ որոշակի պրոցեսների արդյունքում համապատասխան գնահատականի արժանացած մարդկանց Հայաստանում աշխատանք առաջարկվի»,- նշեց վարչապետը։

Նիկոլ Փաշինյանը հավելեց նաև, որ գործընթացն արդեն մտել է գործնական փուլ, և ինքն անձամբ պատրաստվում է հանդիպել հավակնորդներից մի քանիսի հետ։

«Արդեն իսկ կան մարդիկ, որոնց պատրաստվում եմ առաջիկայում հանդիպել: Կքննարկենք: Նույնիսկ չեմ բացառում նրանց բարձր պաշտոններում նշանակելու հնարավորությունը»,- ընդգծեց կառավարության ղեկավարը:

Հիշեցնենք, որ օրերս ՀՀ վարչապետը հանդես էր եկել հայտարարությամբ՝ աշխարհի առաջատար 200 բարձրագույն ուսումնական հաստատությունների սովորողներին ու շրջանավարտներին հրավիրելով իրենց ներուժն իրացնել Հայաստանի պետական համակարգում։