ԱՄՆ-ն արդեն մեծ ֆոնդի հատկացում է արել. Փաշինյանը՝ TRIPP նախագծի իրագործման մասին

Միացյալ Նահանգներում խոշոր ֆոնդ ստեղծելու որոշում է կայացվել, որի միջոցներով ֆինանսավորվելու է ինչպես TRIPP (Տարածաշրջանային ենթակառուցվածքների զարգացման) նախագիծը, այնպես էլ տարածաշրջանային այլ ծրագրեր։ Լրագրողների հետ ճեպազրույցի ժամանակ այս մասին հայտարարել է վարչապետ Նիկոլ Փաշինյանը՝ անդրադառնալով նախագծի իրագործման ընթացքին։

«Արդեն մեծ ֆոնդի հատկացում է արված։ Թիվը չասեմ, որ չսխալվեմ, բայց արդեն խոշոր միջոցներ են նախատեսված»,- նշել է կառավարության ղեկավարը։

Անդրադառնալով հայկական կողմի անելիքներին ու պատասխանատվությանը՝ Նիկոլ Փաշինյանը վստահեցրել է, որ պաշտոնական Երևանն ամբողջությամբ կկատարի ստանձնած բոլոր պարտավորությունները։

 Փաստաթուղթն արագ ստորագրվել է, և այս պահին գտնվում է վավերացման փուլում։

 Վարչապետի փոխանցմամբ՝ կողմերը չեն պատրաստվում սահմանափակվել միայն իրավական ձևակերպումներով։

«Ֆորմալություններին պետք է չսպասենք, հնարավորինս արագ պետք է գնանք առաջ։ Դա է նաև Միացյալ Նահանգների տրամադրությունն ու տրամադրվածությունը»,- եզրափակել է վարչապետը։