Անահիտ Ավանեսյանը ցանկանում է շարունակել պաշտոնավարել որպես Առողջապահության նախարար

ՀՀ առողջապահության նախարար Անահիտ Ավանեսյանը ցանկություն ունի, որ նոր ձևավորվող կառավարությունում շարունակի ղեկավարել հենց առողջապահական ոլորտը։ Այս մասին նա հայտարարեց կառավարության նիստից հետո լրագրողների հետ զրույցում՝ շեշտելով, որ սա իր անձնական ցանկությունն է։

Լրագրողների հարցին՝ հնարավո՞ր է, որ վարչապետ Նիկոլ Փաշինյանը որոշի նրան առաջարկել փոխվարչապետի պաշտոնը, Ավանեսյանը հստակ պատասխան չտվեց.

«Ես ցանկանում եմ շարունակել ղեկավարել առողջապահության նախարարությունը։ Կաբինետի վերաբերյալ վարչապետն ինքը կներկայացնի, ես ներկայացնում եմ, թե որտեղ եմ ինքս ինձ տեսնում»,- նշեց նախարարը։

Անահիտ Ավանեսյանը «Քաղաքացիական պայմանագիր» կուսակցության նախընտրական ցուցակում զբաղեցնում է 3-րդ հորիզոնականը և ցուցակի առաջին կին գործիչն է։

Նախընտրական քարոզարշավի ժամանակ նրա ընդգծված ակտիվությունից հետո քաղաքական կուլիսներում և մամուլում ենթադրություններ հնչեցին, որ Ավանեսյանին նոր կառավարությունում կարող է առաջարկվել ավելի բարձր՝ փոխվարչապետի պաշտոնը։ Այնուամենայնիվ, գործադիրի վերջնական կազմը, ինչպես նշեց Ավանեսյանը, կորոշի և կներկայացնի երկրի վարչապետը։