Անահիտ Մանասյանը ՄԱԿ-ի նիստում կարևորել է Ստամբուլյան կոնվենցիայի վավերացումը Հայաստանի կողմից

Հայաստանում կանանց նկատմամբ առկա կարծրատիպերը խոչընդոտում են նրանց իրավունքների և բռնության զոհերի շահերի պաշտպանությանը։ Այս մասին հունիսի 24-ին Ժնևում տեղի ունեցած ՄԱԿ-ի Մարդու իրավունքների խորհրդի 62-րդ նստաշրջանի նիստում հայտարարել է ՀՀ Մարդու իրավունքների պաշտպան (ՄԻՊ) Անահիտ Մանասյանը։

Կանանց և աղջիկների նկատմամբ բռնության հիմնախնդրին նվիրված պանելային քննարկման ընթացքում Պաշտպանը հանդես է եկել տեսաուղերձով։

Իր ելույթում Անահիտ Մանասյանն անդրադարձել է Հայաստանում կանանց և աղջիկների իրավունքների պաշտպանության հիմնահարցերին՝ հատուկ շեշտադրելով միջազգային իրավական գործիքակազմերի կիրառումը։

«Մարդու իրավունքների պաշտպանը կարևորել է Հայաստանի կողմից Եվրոպայի խորհրդի՝ կանանց նկատմամբ բռնության և ընտանեկան բռնության կանխարգելման ու դրանց դեմ պայքարի կոնվենցիայի (Ստամբուլյան կոնվենցիա) վավերացման անհրաժեշտությունը»,- նշված է հաղորդագրության մեջ։

ՄԻՊ-ի փոխանցմամբ՝ հասարակությունում արմատացած կարծրատիպերը շարունակում են լուրջ մարտահրավեր մնալ բռնության ենթարկված անձանց իրավունքների լիարժեք պաշտպանության ճանապարհին: