Արարատ Միրզոյան․ Հայաստանի դիվանագիտական ծառայությունը թևակոխում է նոր փուլ

Շարունակվում են ՀՀ ԱԳՆ կենտրոնական ապարատի և արտերկրում դիվանագիտական ներկայացուցչությունների ղեկավարների տարեկան աշխատաժողովի աշխատանքները:

ԱԳ նախարար Արարատ Միրզոյանն ընդգծել է, որ Հայաստանի Հանրապետությունը և դիվանագիտական ծառայությունը թևակոխում են նոր փուլ, որտեղ խաղաղությունն արդեն իրողություն է: Ըստ նախարարի՝ նոր իրողությունների պայմաններում դիվանագիտական կորպուսի հիմնական առաջադրանքը ՀՀ անկախության, դիմակայունության ամրապնդումն ու առկա հնարավորությունների առավելագույնս իրացումն է:

Քննարկումների առանցքային թեմաները․

• Տարածաշրջանային ինտեգրում. Անդրադարձ է կատարվել ՀՀ զարգացման և տարածաշրջանային փոխկապակցվածության ցանցին արդյունավետ ինտեգրվելու պատմական հնարավորություններին:
• Արտաքին քաղաքականության դիվերսիֆիկացում. Քննարկվել են հարևանների հետ հարաբերությունների կարգավորման, գործընկերությունների ընդլայնման, կապերի դիվերսիֆիկացման և տնտեսական բաղադրիչի լիակատար իրացման հարցեր:
• Խաղաղության ինստիտուցիոնալացում. Մտքեր են փոխանակվել խաղաղության շարունակական ամրապնդման, միջազգային զարգացումների և բազմակողմ հարթակներում Հայաստանի ներգրավվածության նոր առաջնահերթությունների շուրջ:

Նախարար Միրզոյանը նաև պատասխանել է դեսպանների և դիվանագիտական ծառայության մարմինների ղեկավարների հարցերին: