Այսօր մենք կենտրոնացած ենք մոդուլային ատոմակայանի վրա

Այսօր լրագրողների հետ հանդիպման ժամանակ պատասխանելով բազմաթիվ հարցերի, վարչապետ Նիկոլ Փաշինյանին հարց ուղղվեց՝կապված ռուսական կողմից առաջարկված ատոմակայանի կառուցման հետ, ըստ որի դրանով հնարավոր կլինի բավարարել մեր երկրի էներգետիկ կարիքները տասնամյակներ շարունակ: Վարչապետը հավաստիացրեց, որ իրապես նման առաջարկ ռուսական կողմից եղել է, սակայն Հայաստանը նման առաջարկներ ստացել է մի շարք այլ երկրներից:

«Հիմնականում այդ առաջարկները մեծ ատոմակայաններ կառուցելու մասին են,սակայն մենք նման մեծ ատոմակայանի կարիք չենք ունենալու, որովհետև մենք ունենք մեր ռեսուրսը՝ արևը և հիմա մենք կենտրոնացած ենք մոդուլային ատոմակայանի վրա: Իսկ նման ատոմակայաններն ունեն մի շարք առավելություններ»,-ասաց Փաշինյանը:

Խոսելով մոդուլային ատոմակայանների մասին, վարչապետն առանձնացրեց դրանց անվտանգության գործոնը ասելով, որ դրանց վթարը համարվում է տեղային միջադեպ:

«Մոդուլային ատոմակայանից մեկ կիլոմետր հեռավորության վրա գտնվող բնակավայրը չի էվակուացվում պատահարի ժամանակ, իսկ սա շատ կարևոր առանձնահատկություն է: Ատոմակայանի հարցը տնտեսական հարց է և ոչ քաղաքական, և մենք ուզում ենք Հայաստանի համար ծրագրի շահավետությունը երաշխավորել: Որ երկրից կլինի լավագույն առաջարկը՝ նրանց հետ էլ կաշխատենք»,- եզրափակեց Փաշինյանը: