ԱԺ-ն ընդունել է կենսաչափական նոր համակարգի ներդրման մասին օրենքը

Հայաստանի Ազգային ժողովի արտահերթ նիստում երկրորդ ընթերցմամբ և ամբողջությամբ ընդունվել է ՆԳ նախարար Արփինե Սարգսյանի ներկայացրած «Անձը հաստատող փաստաթղթի մասին» օրենքի և հարակից օրենքների նախագծերի փաթեթը, որով նախատեսվում է Հայաստանում նոր կենսաչափական համակարգի ներդրում։

«Արմենպրես»-ի հաղորդմամբ՝ նախարար Սարգսյանը նշել է, որ նախաձեռնության նպատակը անձը հաստատող փաստաթղթերի ոլորտում պատշաճ իրավական ընթացակարգերի ապահովումն է, ինչպես նաև Հայաստանի՝ Եվրոպական միության հետ վիզաների ազատականացման գործընթացին մոտեցնելը։

«Լայն համատեքստում սա ևս մեկ քայլ է Հայաստանի Հանրապետությանը մոտեցնելու ԵՄ հետ վիզաների ազատականացմանը»,- ընդգծել է նա։

Նախարարի խոսքով՝ Եվրոպական միությունից արդեն ստացվել է Վիզաների ազատականացման գործողությունների ծրագրի առաջընթացի վերաբերյալ առաջին զեկույցը, որտեղ առանձին անդրադարձ կա «Անձը հաստատող փաստաթղթի մասին» օրենքին։

Օրենքների փաթեթով առաջարկվում է 16 տարին լրացած քաղաքացիների համար նույնականացման քարտ ունենալը դարձնել պարտադիր։ 6-ից 16 տարեկան երեխաների համար քարտ ունենալը նախատեսվում է կամավոր սկզբունքով, իսկ մինչև 6 տարեկանների դեպքում անձը հաստատող փաստաթուղթ կհամարվի ծննդյան վկայականը։

Արփինե Սարգսյանի խոսքով՝ նոր փաստաթղթերը համապատասխանելու են ICAO-ի 9303 միջազգային ստանդարտին։ Նա նաև նշել է, որ օտարերկրացիների համար նախատեսված փաստաթղթերը ևս պետք է պարունակեն կենսաչափական տվյալներ։

Նախարարի խոսքով՝ կենսաչափական համակարգի ներդրումը նախատեսվում է իրականացնել պետություն-մասնավոր գործընկերության ձևաչափով, սակայն պետությունը պահպանելու է որոշումների կայացման լիարժեք իրավունքը։

«Մասնավորը որևէ գործողություն կամ քայլ չի կարող կատարել, որը փաստական հետևանքներ է առաջացնելու մեր քաղաքացիների համար»,- ընդգծել է Սարգսյանը։

Ամփոփելով խոսքը՝ ՆԳ նախարարը նշել է, որ կենսաչափական համակարգը ծառայելու է նաև կառավարության թվայնացման քաղաքականությանը։

«Կարծում եմ՝ արդեն 2026 թվականի աշնանը մենք լիովին նոր իրավիճակ կարձանագրենք Հայաստանի Հանրապետությունում, և թվայնացման տեմպերը գնալով էլ ավելի կարագանան»,- հայտարարել է նա։