Բոլոր բնակավայրերի մուտքերի մոտ պետական դրոշի առկայությունը կդառնա պարտադիր. նախագիծ

ԱԺ պետական-իրավական հարցերի մշտական հանձնաժողովի արտահերթ նիստում քննարկվել է ««Հայաստանի Հանրապետության դրոշի մասին» օրենքում լրացումներ կատարելու մասին» օրենքի նախագիծը։

Ինչպես հուլիսի 1-ին կայացած նիստի ժամանակ հայտնել է «Քաղաքացիական պայմանագիր» խմբակցության պատգամավոր Ալխաս Ղազարյանը, Հայաստանում այժմ բացակայում է հստակ իրավական կարգավորում, որը կպարտադրի պետական դրոշի առկայությունը բոլոր բնակավայրերի մուտքերի մոտ։

«Գործնականում միասնական մոտեցում ու պարտադիր պահանջ չկա, և որոշ տեղերում դրոշները տեղադրվում են համայնքային նախաձեռնությամբ»,- պարզաբանել է պատգամավորը։

Ալխաս Ղազարյանն առաջին ընթերցմամբ ներկայացրել է օրենսդրական այս նախաձեռնությունը, որի համահեղինակն է ԱԺ նախագահ Ալեն Սիմոնյանի հետ։

Նիստի ընթացքում պատգամավորները հարցեր են ուղղել պետական դրոշի գործածման ընդհանուր կարգի և բնակավայրերում դրանց տեղադրման վայրի ընտրության վերաբերյալ, որոնց հիմնական զեկուցողը տվել է սպառիչ պատասխաններ։

• Պետական-իրավական հարցերի մշտական հանձնաժողովի անդամ Անուշ Քլոյանը դրական է գնահատել օրենսդրական նախաձեռնությունը։

•  Գործադիրի դրական դիրքորոշումը հայտնել է ՀՀ տարածքային կառավարման և ենթակառուցվածքների նախարարի տեղակալ Առնակ Ավետիսյանը։ Փոխնախարարը նշել է, որ Կառավարության ներկայացրած առաջարկները նախագծի համահեղինակների կողմից ընդունվել են։

Հանձնաժողովը կողմ է քվեարկել և դրական եզրակացություն տվել օրենքի նախագծի լրամշակված տարբերակին։