Դատախազության միջամտությամբ Աչաջուրի և Գետահովիտի մշակույթի տների տարածքները վերադարձվել են համայնքին։

Տավուշի մարզի դատախազության կողմից պետական (համայնքային) շահերի պաշտպանության շրջանակում իրականացված ուսումնասիրությունների արդյունքում արձանագրվել են խախտումներ Իջևան համայնքի Աչաջուր և Գետահովիտ բնակավայրերի մշակույթի տների տարածքների վարձակալության գործընթացում, այս մասին հայտնում է ՀՀ գլխավոր դատախազությունը։

Պարզվել է, որ Աչաջուր բնակավայրի մշակույթի տան առաջին հարկում գտնվող 31,9 քմ մակերեսով տարածքը, «Գնահատման գործունեության մասին» ՀՀ օրենքի պահանջների խախտմամբ, վարձակալության է հանձնվել ամսական ընդամենը 2000 դրամով։

Նույն կերպ, Գետահովիտ բնակավայրի մշակույթի տան 9,2 քմ մակերեսով տարածքը վարձակալության է տրամադրվել ամսական 5000 դրամով՝ նույնպես օրենքի պահանջների խախտմամբ։

Դատախազական ներգործության արդյունքում Իջևան համայնքը լուծել է վարձակալության պայմանագրերը, չեղարկվել են վարձակալության իրավունքի պետական գրանցումները, իսկ մշակույթի տներում գտնվող անշարժ գույքերը վերադարձվել են համայնքի տիրապետմանն ու օգտագործմանը։

Խոսքը վերաբերում է Աչաջուրի մշակույթի տան 31,9 քմ և Գետահովիտի մշակույթի տան 9,2 քմ մակերեսով տարածքներին։