Դատախազությունը Դիլիջանում գտնվող՝ շուրջ 190 միլիոն դրամ արժեքով անշարժ գույքը համայնքին վերադարձնելու նպատակով պետշահերի հայց է ներկայացրել դատարան

Տավուշի մարզի դատախազությունը, պետական (համայնքային) շահերի պաշտպանության հայց հարուցելու լիազորության շրջանակներում, դատական գործընթաց է սկսել Մանվել Գրիգորյանի ընտանիքին պատկանող «Արա և Այծեմնիկ» ԲԲ ընկերության դեմ։ Այս մասին հայտնում են ՀՀ գլխավոր դատախազության մամուլի ծառայությունից։

Ըստ դատախազության ուսումնասիրությունների՝ 2026 թվականի հունիսի 22-ին հայցադիմում է ներկայացվել Հակակոռուպցիոն դատարան։

Իրավապահ մարմինը պահանջում է անվավեր ճանաչել Տավուշի մարզի Դիլիջան քաղաքի Մաքսիմ Գորկու 27 հասցեում գտնվող անշարժ գույքի աճուրդը և կիրառել անվավերության հետևանքներ։ Նշված գույքի շուկայականին մոտարկված կադաստրային արժեքը կազմում է 189 միլիոն 903 հազար դրամ։

Հակակոռուպցիոն դատարանը 2026 թվականի հուլիսի 1-ին ներկայացված հայցադիմումն ընդունել է վարույթ։

Միաժամանակ, դատարանը կիրառել է հայցի ապահովման միջոց, որի համաձայն՝ «Արա և Այծեմնիկ» ԲԲ ընկերությանն արգելվել է որևէ եղանակով օտարել կամ գրավադրել Դիլիջանում գտնվող հիշյալ անշարժ գույքը։