Դատարանը ոչ իրավաչափ է ճանաչել ոստիկանության անգործությունը Սուրբ Հովհաննավանքի գործով

ՀՀ վարչական դատարանը (դատավոր Վարազդատ Միքայելյան) բավարարել է Հայաստանյայց առաքելական սուրբ եկեղեցու (ՀԱԵ) հայցն ընդդեմ ՆԳՆ ոստիկանության։ Ինչպես հայտնում է փաստաբան Արա Զոհրաբյանը, դատարանը ոչ իրավաչափ է ճանաչել ոստիկանության անգործությունը Սուրբ Հովհաննավանքի միջադեպի ժամանակ։

Մայր աթոռը նախապես դիմել էր ոստիկանությանը՝ խնդրելով կանխել կարգալույծ հռչակված Ստեփան Ասատրյանի հնարավոր ներխուժումը Սուրբ Հովհաննավանքի Սուրբ խորան, Ավանդատուն և Ատյան՝ այնտեղ ծիսական գործողություններ կատարելու նպատակով։ Սակայն ոստիկանությունը ոչ միայն չի կանխել պահանջվող գործողությունները, այլև չի մեկնել դեպքի վայր։

•  Դատարանն ընդգծել է, որ ոստիկանությունը պարտավոր էր արձագանքել Մայր աթոռի դիմումին, ժամանել դեպքի վայր և օրենքով սահմանված կարգով պաշտպանել սեփականության իրավունքը:

•  Վճռում նշվում է, որ թեև եկեղեցին բաց է հանրության համար, Սուրբ Խորանը, Ատյանն ու Ավանդատունը նախատեսված են բացառապես եկեղեցական ծառայության համար:

•  Հղում անելով Սահմանադրության 18-րդ հոդվածին՝ դատարանն արձանագրել է, որ պաշտամունքային տարածքների օգտագործման կարգի և դրանցում գտնվելու իրավասություն ունեցող անձանց շրջանակի որոշումը վերապահված է բացառապես ՀԱԵ իրավասու մարմիններին։

Սա նմանատիպ երկրորդ դեպքն է. ավելի վաղ Վարչական դատարանը (դատավոր Աղասի Դարբինյան) բավարարել էր եկեղեցու հայցն ընդդեմ ոստիկանության՝ Թալինի սուրբ Աստվածածին եկեղեցու գործով։