ԵՄ-ն կշարունակի աջակցել Հայաստանի և Ադրբեջանի միջև խաղաղության գործընթացին. Մագդալենա Գրոնո

Հարավային Կովկասի և Վրաստանում ճգնաժամի հարցերով ԵՄ հատուկ ներկայացուցիչ Մագդալենա Գրոնոն, ով աշխատանքային այցով գտնվում է Բաքվում, հայտարարել է, որ Եվրամիությունը կշարունակի իր աջակցությունը Երևանի և Բաքվի միջև խաղաղության գործընթացին։

«Մենք համակարծիք ենք, որ չափազանց կարևոր է պահպանել այն դրական դինամիկան, որը ձևավորվել է երկու երկրների միջև կայուն խաղաղության հասնելու ճանապարհին արձանագրված պատմական ձեռքբերումների շնորհիվ», - X-ի իր միկրոբլոգում գրել է ԵՄ հատուկ ներկայացուցիչը՝ ամփոփելով Ադրբեջանի պաշտոնական անձանց, մասնավորապես՝ նախագահի օգնական Հիքմեթ Հաջիևի և հատուկ հանձնարարություններով ներկայացուցիչ Էլչին Ամիրբեկովի հետ ունեցած խորհրդակցությունները:

Հաղորդվում է նաև, որ Բաքվում կայացած հանդիպումների ընթացքում քննարկվել են Ադրբեջան-Եվրամիություն հարաբերությունների զարգացման հեռանկարները։