Երևանում ավարտվել է Եվրոպական դատախազների բարձրաստիճան համաժողովը. 2027-ին կքննարկվի տուժողների իրավունքների պաշտպանությունը

Երևանում ամփոփվել են Եվրոպական դատախազների երկխոսության հայկական հարթակի շրջանակում հուլիսի 1-ին մեկնարկած բարձրաստիճան միջազգային երկօրյա համաժողովի արդյունքները: ՀՀ գլխավոր դատախազությունից հայտնում են, որ միջոցառմանը մասնակցել են բարձրաստիճան պատվիրակներ և փորձագետներ Եվրոպայի խորհրդից, Եվրոպական միությունից և շուրջ մեկ տասնյակից ավելի եվրոպական երկրներից:

Ամփոփելով արդյունքները՝ ՀՀ գլխավոր դատախազ Աննա Վարդապետյանն ընդգծել է, որ դատախազական համակարգի գործառույթը՝ որպես իրավունքի պաշտպաններ, գնալով պետք է ամրապնդվի: Այս համատեքստում նա կարևորել է շարունակական կրթությունն ու կարգապահ վարքագիծը:

«Նոր բան սովորելը սեփական կամքի նկատմամբ բռնության մասին չէ: Կարգապահությունն ազատ ժամանակը գրագետ և հաճելի նորություններով լցնելու հնարավորության մասին է»,- նշել է Աննա Վարդապետյանը:

Գլխավոր դատախազն առաջարկել է եվրոպական գործընկերներին մտածել 2027 թվականին նախատեսվող հաջորդ համաժողովի օրակարգի մասին՝ որպես հիմնաքար ընդունելով տուժողների իրավունքների պաշտպանության հիմնահարցը: Նա նաև շնորհակալություն է հայտնել ԵԽ-ին և ԵՄ-ին՝ վստահելի գործընկերության համար, ինչն իր հերթին բարձր է գնահատել Երևանում ԵԽ գրասենյակի ղեկավար Մաքսիմ Լոնգանգեն:

Երկօրյա քննարկումների ընթացքում միջազգային և տեղական փորձագետներն անդրադարձել են իրավական համակարգի արդիական մարտահրավերներին.

•  Քննարկվել են ԱԻ կիրառմամբ կատարվող խարդախությունների նոր դրսևորումները, կրիպտոակտիվների օգտագործմամբ հանցավոր սխեմաները, փողերի լվացման և կոռուպցիայի բացահայտման մեխանիզմները:

•  Մասնակիցներն անդրադարձել են ապօրինի ծագում ունեցող ակտիվների հայտնաբերման, սառեցման և կառավարման մոդելներին, ինչպես նաև այս հարցում ՄԻԷԴ դիրքորոշումներին:

• Դիտարկվել է հանցագործությունից տուժած անձանց շահերի ապահովման միջազգային լավագույն փորձը:

Համաժողովի թեմատիկ քննարկումները վարել են ԵԽ տնտեսական հանցագործությունների և համագործակցության վարչության ղեկավար Եվգենի Եվգենիևը, ՀՀ գլխավոր դատախազի խորհրդական Նարինե Գասպարյանը և ԵԽ պաշտոնյա Լիլիթ Դանեղյանը:

Զեկույցներով հանդես են եկել բարձրաստիճան իրավաբաններ և դատախազներ Իտալիայից, Մալթայից, Լեհաստանից, Պորտուգալիայից, Ֆրանսիայից, Ռումինիայից, Լատվիայից և Ավստրիայից, ինչպես նաև ՄԱԿ-ի փորձագետներ և ՀՀ դատաիրավական համակարգի ներկայացուցիչներ (այդ թվում՝ ՀՀ գլխավոր դատախազի տեղակալ Էդգար Արսենյանը, Վճռաբեկ դատարանի դատավոր Գևորգ Գյոզալյանը և ավագ դատախազ Ծովակ Մնացականյանը):

Միջոցառման ավարտին Եվրոպայի դատախազների խորհրդատվական խորհրդի (CCPE) քարտուղարության ղեկավար Արտաշես Մելիքյանը ներկայացրել է կառույցի 2026 թվականի № 21 եզրակացության նախագծի հիմնական դրույթները: