«Ըսավ քուգդ բդի էղնի 120». նոր ձայնագրություն ընտրակաշառքի գործով

Հայաստանի Հանրապետության հակակոռուպցիոն կոմիտեի և Ազգային անվտանգության ծառայության (ԱԱԾ) համատեղ ձեռնարկած միջոցառումների արդյունքում ընտրակաշառքի դեպքեր են բացահայտվել, հայտնում են Հակակոռուպցիոն կոմիտեից:

Հակակոռուպցիոն կոմիտեում նախաձեռնված քրեական վարույթի շրջանակներում փաստական տվյալներ են ձեռք բերվել այն մասին, որ «Հայաստան» կուսակցությունների դաշինքի պատգամավորի թեկնածուները, համագործակցելով դաշինքի համակիրների և այլ անձանց հետ, Շիրակի մարզի մի շարք բնակիչների տվել են տարբեր չափերի ընտրակաշառք:

Ըստ իրավապահ մարմինների տարածած հաղորդագրության՝ գումարը տրամադրվել է Ազգային ժողովի ընտրություններին հիշյալ դաշինքի օգտին քվեարկելու, ինչպես նաև ընտրակաշառքի դիմաց քվեարկելու պատրաստակամ այլ անձանց հավաքագրելու պայմանով։

Դեպքի առթիվ նախաձեռնված քրեական վարույթի շրջանակներում արդեն իսկ ձերբակալվել են մի շարք անձինք: Իրավապահները կատարել են խուզարկություններ և անհրաժեշտ այլ վարութային գործողություններ։