Գեղամ Գևորգյանը՝ անձրևի ժամանակ տաքսի ծառայությունների գնի քառակի բարձրացման մասին

Ազգային ժողովում Մրցակցության և սպառողների շահերի պաշտպանության հանձնաժողովի (ՄՍՇՊՀ) նախորդ տարվա պետական բյուջեի կատարողականի քննարկման ժամանակ անդրադարձ է կատարվել տաքսի ծառայությունների գնագոյացման խնդրին:

ԱԺ պատգամավոր Գեղամ Նազարյանն իր մտահոգությունն էր հայտնել առ այն, որ վատ եղանակային պայմաններում և անձրևի ժամանակ տաքսի ծառայությունները կարող են ընդհուպ 4 անգամ բարձրացնել ուղևորության արժեքը, և հետաքրքրվել էր, թե երբ է խնդիրը կարգավորվելու:

ՄՍՇՊՀ նախագահ Գեղամ Գևորգյանը պարզաբանել է, որ ծառայության գինը բարձրանում է ոչ թե անձրևի փաստի, այլ առաջարկ-պահանջարկի և երթևեկության տևողության փոփոխության պատճառով:

«Ալգորիթմը հետևյալ ձևով է աշխատում. հաշվարկվում է այն ժամանակը, որ վարորդը ծախսելու է Ա-ից Բ կետը հասնելու համար, և կիլոմետրը: Անձրևի ժամանակ Ա-ից Բ կետ հասնելու համար վարորդն ավելի շատ ժամանակ է ծախսում (խցանումների պատճառով)»,- նշել է հանձնաժողովի ղեկավարը։

Գեղամ Գևորգյանը հայտնել է, որ հանձնաժողովի միջամտությամբ արդեն իսկ հստակ սահմանափակումներ են մտցվել շուկայի խոշորագույն օպերատորի գործունեության մեջ.

• Առավելագույն շեմը. Բարձր պահանջարկի պահերին կիրառվող առավելագույն գործակիցը սահմանափակվել է 2 անգամով:

• «Յանդեքսի» միջնորդավճարը. Երբ գործակիցը հասնում է երկուսի, «Յանդեքս» ընկերությունն այդ ուղևորությունից ընդհանրապես գումար չի գանձում:

«Երկու անգամից ավելի գործակցի պարագայում «Յանդեքս» ընկերությունն ընդհանրապես գումար չի աշխատում, այսինքն՝ եթե նույնիսկ գինը բարձրացավ, ամբողջ գումարը մնում է տաքսու վարորդին»,- եզրափակել է ՄՍՇՊՀ նախագահը։