Գերիների և պահվող անձանց վերադարձի հարցն ամենօրյա աշխատանքի մաս է. Ռուբինյան

«Ով պիտի ինձ փոխարինի, չգիտեմ, չեմ մտածել: Եթե Կառավարությունն իմ խորհրդի կարիքն ունենա, կքննարկենք: Բայց այդ հարցը Կառավարության տիրույթում է»,- խորհրդարանական ճեպազրույցի ժամանակ հայտարարել է Ազգային ժողովի նորընտիր նախագահ Ռուբեն Ռուբինյանը՝ պատասխանելով այն հարցին, թե ով է ստանձնելու Հայաստան-Թուրքիա կարգավորման գործընթացում հատուկ բանագնացի պաշտոնը:

Անդրադառնալով Բաքվում պահվող հայ գերիների և այլ պահվող անձանց հայրենադարձման թեմային՝ ԱԺ նախագահն ընդգծել է, որ այդ ուղղությամբ տարվող աշխատանքը կրում է ամենօրյա բնույթ և երբեք չի դադարում:

«Այդ ամենօրյա աշխատանքի շնորհիվ է, որ 200-ից ավելի գերիներ այս տարիների ընթացքում վերադարձել են հայրենիք: Եթե նկատել եք, եղել են ամիսներ, որ որևէ շարժ չի եղել, էլի քնարկումներ են եղել այն մասին, որ Կառավարությունը բան չի անում, բայց հանկարծ վերադարձել են նոր գերիներ: Մենք ամեն ինչ անելու ենք, որ դա արագ տեղի ունենա»,- նշել է Ռուբինյանը:

Նա հավելել է, որ օրենսդիր մարմինը նույնպես ակտիվորեն կշարունակի ներգրավված մնալ այս հարցում. «Բնականաբար, մենք էլ խորհրդարանական մակարդակում ինչպես աշխատել ենք այդ ուղղությամբ, այդպես էլ կաշխատենք»: