Հակակոռուպցիոնը մերժեց միջնորդությունը. Առուշ Առուշանյանի պատիժը չի փոխարինվի ազատազրկմամբ

Գորիս համայնքի ղեկավար Առուշ Առուշանյանի նկատմամբ կիրառված պատիժը ազատազրկմամբ չի փոխարինվի։ ՀՀ հակակոռուպցիոն դատարանը՝ դատավոր Տիգրան Դավթյանի նախագահությամբ, մերժել է Պրոբացիայի ծառայության ներկայացրած միջնորդությունը։

«ՏԻՄ մարմիններում ղեկավար պաշտոն զբաղեցնելու իրավունքից զրկելն ազատազրկմամբ փոխարինելու, ինչպես նաև ազատազրկման ձևով պատիժը պայմանականորեն չկատարելու վերաբերյալ որոշումը վերացնելու և պատիժ չկրելու վերաբերյալ որոշումը մերժել»,- դատական նիստի ժամանակ որոշման եզրափակիչ մասն է ընթերցել դատավոր Դավթյանը։

Դատարանը հիմնավոր է համարել պաշտպանական կողմի դիրքորոշումը՝ արձանագրելով, որ գործող իրավակարգավորումները վատթարացնում են Առուշանյանի իրավական վիճակը, քանի որ վերջինիս կողմից արարքը կատարելու և դատապարտվելու պահին նման կարգավորումներ գոյություն չեն ունեցել։

Հիշեցնենք, որ 2022 թվականին կայացված դատավճռով Առուշ Առուշանյանը մեկ դրվագով արդարացվել էր, իսկ մեկ այլ դրվագով՝ դատապարտվել 1 տարի 6 ամիս ազատազրկման։ Հաշվի առնելով կալանքի տակ անցկացրած ժամանակահատվածը՝ վերջնական պատիժ էր սահմանվել 6 ամիս ազատազրկումը, որը պայմանականորեն չէր կիրառվել։ Բացի այդ, Գորիսի համայնքապետը 5 տարի ժամկետով զրկվել էր տեղական ինքնակառավարման մարմիններում ղեկավար պաշտոն զբաղեցնելու իրավունքից։