«Ժողովուրդը սա շանտաժ է համարում». Կոնջորյանը՝ ՌԴ Պետդումայի նախագահի հայտարարության մասին

Այսօր ԱԺ «Քաղաքացիական պայմանագիր» խմբակցության ղեկավար Հայկ Կոնջորյանը քարոզարշավի ընթացքում անդրադարձել է Ռուսաստանի Դաշնության Պետական դումայի նախագահ Վյաչեսլավ Վոլոդինի հայտարարությանը ըստ որի՝ Հայաստանի իշխանությունների վերջին քայլերը չեն կարող դիտարկվել որպես բարեկամական վերաբերմունք Ռուսաստանի և ռուս ժողովրդի նկատմամբ։ Վոլոդինը նաև զուգահեռներ էր անցկացրել Ուկրաինայի հետ՝ նշելով, որ «ամեն ինչ այսպես սկսվեց Ուկրաինայում»։

«Արմպուլս»-ի լրագրողի հարցին, թե արդյոք այս հայտարարությունները կարելի՞ է դիտարկել որպես սպառնալիք Հայաստանի և հայ ժողովրդի հասցեին, Կոնջորյանը պատասխանել է, որ նման ձևակերպումներն արդեն իսկ չեն կրում բարեկամական բնույթ։
«Այս հայտարարությունները, բնականաբար, լսում է մեր ժողովուրդը, և դրանք հասարակության կողմից ընկալվում են որպես շանտաժ։ Ժողովրդի մոտ հարց է առաջանում, թե ինչպես կարող է մեր դաշնակիցը մեզ սպառնալ»,- ասել է Կոնջորյանը։

Նա հավելել է, որ հասարակությունը լավ է հասկանում նման հայտարարությունների շարժառիթները և վստահություն հայտնել, որ հունիսի 7-ին ժողովուրդը ցույց կտա իր վերաբերմունքը դրանց նկատմամբ։
«Մեր ժողովուրդը շատ լավ գիտի, որ մեր գործողությունների հիմքում ընկած է մեր երկրի պետական շահը։ Մենք բոլոր պետությունների նկատմամբ ունենք մեծ հարգանք, սակայն առաջին հերթին առաջնորդվում ենք մեր պետական շահերով»,- նշել է Հայկ Կոնջորյանը։