Հայաստանի հրաձգության հավաքականը 9 մեդալ է նվաճել աշխարհի առաջնությունում

Էստոնիայի մայրաքաղաք Տալլինում հուլիսի 20-26-ն անցկացված շարժվող թիրախ մրցաձևի աշխարհի առաջնությունում Հայաստանի հավաքականը նվաճել է 9 մեդալ՝ 5 ոսկե, 1 արծաթե և 3 բրոնզե։ Այս մասին հայտնում է ՀՀ ԿԳՄՍ նախարարությունը:

Պատմության մեջ առաջին անգամ Հայաստանն ունեցել է աշխարհի չեմպիոններ այս մրցաձևում։ Մեծահասակների պայքարում աշխարհի չեմպիոնի տիտղոսին են արժանացել Հայկ Մինասյանը և Գոռ Խաչատրյանը։

Հաջողությունն ամրապնդվել է նաև թիմային պայքարում․ Հայկ Մինասյան, Գոռ Խաչատրյան և Հովհաննես Մարգարյան եռյակը շարժվող թիրախի նորմալ վազք մրցաձևում դարձել է ոսկե մեդալակիր:

Երիտասարդների աշխարհի առաջնությունում փայլուն արդյունք է գրանցել Աիդա Ազատյանը՝ հռչակվելով աշխարհի առաջնության կրկնակի հաղթող։

Հայաստանի ներկայացուցիչները մեդալներ են նվաճել նաև մյուս մրցաձևերում․

• Արծաթե մեդալ — Տղամարդկանց թիմը (Հայկ Մինասյան, Գոռ Խաչատրյան, Հովհաննես Մարգարյան)՝ խառը վազք մրցաձևում։

• Բրոնզե մեդալ — Հայկ Մինասյանի անհատական նվաճումը։

• Երկու բրոնզե մեդալ — 50 մետր խառը և նորմալ վազք մրցաձևերի թիմային պայքարում (Հայկ Մինասյան, Գոռ Խաչատրյան, Հովհաննես Մարգարյան)։

Հայաստանի հավաքականն աշխարհի առաջնությանը մասնակցել է 12 հրաձիգով: