Հայտնաբերվել է Փամբակ գետում որոնվող երկրորդ անչափահասի մարմինը. ՆԳ նախարարն այցելել է Վանաձոր

Շուրջ մեկ շաբաթ տևած ծավալուն որոնողական աշխատանքներից հետո, հունիսի 22-ին, Փամբակ գետում հայտնաբերվել է հունիսի 15-ից որոնվող երկրորդ անչափահասի մարմինը, հայտնում են ՀՀ ՆԳՆ–ից։

Ներքին գործերի նախարարության փրկարար ծառայության ջրասուզակը դիակը հայտնաբերել է ենթադրյալ դեպքի վայրից շուրջ 550 մետր հեռավորության վրա։

Նույն օրը ՆԳ նախարար Արփինե Սարգսյանը, ՆԳՆ փրկարար ծառայության տնօրեն-նախարարի տեղակալ Արամ Ղազարյանի ուղեկցությամբ, այցելել է Վանաձոր։ Նախարարը եղել է որոնողական աշխատանքները համակարգող շտաբում, որտեղ տեղում հետևել է Փրկարար ծառայության եվ Ոստիկանության ստորաբաժանումների գործողություններին։

Գետում եվ հարակից տարածքներում իրականացված որոնողական աշխատանքներին մեկ շաբաթ շարունակ ներգրավված է եղել ավելի քան 1700 փրկարար, ոստիկան եվ կամավորական խմբեր։ Որոնումներն ընթացել են բարդ եղանակային պայմաններում եվ դժվարանցանելի տեղանքում։

Հիշեցնենք, որ անչափահասների որոնողական աշխատանքները մեկնարկել էին հունիսի 15-ին՝ Փամբակ գետում նրանց կորչելու վերաբերյալ ահազանգից անմիջապես հետո։