Հեռուստատեսության և ռադիոյի հանձնաժողովը տուգանեց «Կենտրոն» հեռուստաընկերությանը 100 հազար դրամով

ՀՌՀ-ն վարույթ է հարուցել «Կենտրոն» ՀԸ-ի դեմ: Ըստ արձանագրության՝ հեռարձակողը յուրաքանչյուր օր իր 5 լրատվական հաղորդումներում նույն թեմայի վերաբերյալ՝ Գագիկ Ծառուկյանի տան, նրան պատկանող ընկերություններում խուզարկությունների եւ ձերբակալության վերաբերյալ լուսաբանումը գերազանցել է հաղորդման եթերաժամի 25 տոկոսը, ինչը օրենքի խախտում է:

ՀՌՀ անդամ Գոհար Մամիկոնյանը նշեց, որ հեռարձակողը ծանուցվել է հարուցված վարչական վարույթի վերաբերյալ, ներկայացրել է դիրքորոշում, որտեղ առարկություն է հայտնել հարուցված վարույթի վերաբերյալ եւ նշել, որ լուսաբանումը բացարձակապես չի վերաբերվում մեկ անձի, «Կենտրոն» ՀԸ-ն մշտադիտարկման ժամանակ լուսաբանել է պետական 6 մարմնի գործողություն՝ Քննչական կոմիտեի, ՊԵԿ-ի, ԱԱԾ-ի, քաղաքապետարանի, Կենդանաբանական այգու եւ գլխավոր դատախազության, ինչպես նաեւ «Մուլտի գրուպ» կոնցեռնի շուրջ 70 ձեռնարկությունում եւ մի շարք տնօրենների բնակարաններում իրականացված խուզարկությունները: