Հերթական ադրբեջանական սադրանքը՝ ուղղված ՀՀ-ի դեմ պետական մակարդակով

Ադրբեջանի Գյոյգյոլի շրջանի Ենի Զոդ գյուղում անցկացվել է այսպես կոչված «Արևմտյան Ադրբեջանի ժառանգությունը՝ վերադարձ պատմական արմատներին» խորագրով փառատոն։

Այս միջոցառման շրջանակում ներկայացվել են տարածաշրջանի մշակույթն ու ավանդույթները արտացոլող տաղավարներ, ցուցադրություններ և համերգային ծրագիր։

Միջոցառման վերաբերյալ լրատվամիջոցներում հրապարակված լուսանկարներում երևում է, որ Հայաստանի Հանրապետության ամբողջ ներկայիս սուվերեն տարածքը ներկայացվում է որպես «Արևմտյան Ադրբեջան»։

Սա դիտարկվում է որպես բացահայտ պրովոկացիա՝ ուղղված ՀՀ սուվերենության և ինքնիշխանության դեմ՝ պետական մակարդակով կազմակերպված նախաձեռնությունների շրջանակում։ Ադրբեջանի նախագահ Իլհամ Ալիևը, խաղաղության մասին հայտարարությունների ֆոնին, երկրի ներսում ձևավորում է այնպիսի նարատիվներ, ըստ որոնց՝ Հայաստանի ողջ տարածքը ներկայացվում է որպես «Արևմտյան Ադրբեջան»։