ՀՀ–ն վերահաստատում է անդամակցությունը Ասիայում մշակութային ժառանգության դաշինքին. նախագիծն արժանացել է դրական եզրակացության

Ասիայում մշակութային ժառանգության դաշինքը տարածաշրջանային համագործակցության կարևոր հարթակ է, որը միավորում է ասիական պետությունների ջանքերը մշակութային ժառանգության պահպանության, կառավարման, հանրահռչակման եվ մասնագիտական կարողությունների զարգացման ուղղություններով, հայտնում են ԿԳՄՍ–ից։

ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի քննարկմանը ««Ասիայում մշակութային ժառանգության դաշինքի» կանոնադրությունը վավերացնելու մասին» օրենքի նախագիծը ներկայացրել է ՀՀ ԿԳՄՍ նախարար Ժաննա Անդրեասյանը:

•  Դաշինքի ստեղծման նախաձեռնությունը մեկնարկել է 2021 թվականի հոկտեմբերի 27-ին: Հայաստանը նախաձեռնության հիմնադիր անդամ է՝ Չինաստանի, Կամբոջայի, Կորեայի Ժողովրդադեմոկրատական Հանրապետության, Իրանի, Ղրղզստանի, Պակիստանի, Սիրիայի, Արաբական Միացյալ Էմիրությունների եվ Եմենի հետ միասին:

•  Կառույցի կանոնադրությունը հաստատվել և ուժի մեջ է մտել 2023 թվականի ապրիլի 25-ին: ՀՀ Ազգային ժողովը 2025 թվականի հունվարի 22-ին վավերացրել էր դրա սկզբնական տարբերակը:

• Կազմակերպության խորհրդի 2-րդ նիստի ընթացքում հաստատվել է կանոնադրության փոփոխություն, ըստ որի՝ կառույցը վերածվել է միջազգային միջկառավարական կազմակերպության: Այս փոփոխությամբ պայմանավորված՝ անհրաժեշտություն է առաջացել վերահաստատելու Հայաստանի անդամակցությունը:

Ժաննա Անդրեասյանը տեղեկացրել է, որ նախարարությունը դաշինքին ներկայացրել է դրամաշնորհային հայտեր, և Հայաստանն արդեն ստացել է շուրջ 32 մլն դրամի աջակցություն:

Այս միջոցներով իրականացվելու է «Մետաքսի ճանապարհի մոդելը տեղական դիտանկյունից. Թալինի և Դաշտադեմի մշակութային փոխկապակցվածության բացահայտում ու պահպանում» ծրագիրը, որն ի կատար է ածելու ՀՀ ԳԱԱ հնագիտության և ազգագրության ինստիտուտը:

Հարցը քննարկվել է հանձնաժողովի՝ հուլիսի 1-ի արտահերթ նիստում եվ ստացել դրական եզրակացություն: Օրենքի նախագիծը նախատեսվում է քննարկել հուլիսի 2-ին գումարվող ԱԺ արտահերթ նստաշրջանի ընթացքում: