Ինչ տեղի է ունենում «Քաղաքացիական պայմանագիր» կուսակցությունում, ժողովրդավարության հերթական դրսևորումն է․Սրբուհի Գալյան

ՍԴ-ի դիմաց պատասխանելով լրագրողների  հարցերին, արդարադատության նախարար Սրբուհի Գալյանն ասել է, որ ընտրություններն անվավեր ճանաչելու հիմքեր որևէ մեկի ներկայացրած փաստարկներում չկա։

«Անվավերության հանգեցնող հիմքեր առհասարակ որևէ մեկի կողմից ներկայացված փաստարկներում առկա չեն, մեր կարծիքն այն է, որ ընտրակաշառքի դեպքերը պետք է արձագանք ստանան իրավապահ մարմինների կողմից և արժանանան քրեական ամենախիստ պատասխանատվության»,- ասել է Սրբուհի Գալյանը:

Սրբուհի Գալյանը պատասխանել է նաև այն հարցին , թե արդյոք նորմալ է, որ ՍԴ-ում դեռ քննարկվում է ընտրությունների արդյունքների վիճարկման հարցը, իսկ ՔՊ-ն արդեն ձևավորում է ԱԺ ու նախապատրաստվում է Կառավարության ձևավորման։

 «Ընտրությունների արդյունքները վավեր են, քանի դեռ դրանք անվավեր չեն ճանաչվում, իսկ այն, ինչ տեղի է ունենում «Քաղաքացիական պայմանագիր» կուսակցությունում, ժողովրդավարության հերթական դրսևորումն է»,- ասել է Գալյանը։