Իրանական վերլուծաբանները խոսել են Ադրբեջանի ուղղությամբ հնարավոր հարվածների մասին

Իրանի «Թասնիմ» լրատվական գործակալության տարածաշրջանային հարցերով վերլուծաբան Ալիռեզա Մաջիդին Tasnimcast փոդքաստում կարծիք է հայտնել, որ Թեհրանը պետք է Իսրայելի դեմ նոր ճակատ բացելու շրջանակում ուշադրություն դարձնի նաև Ադրբեջանի ուղղությանը, այս մասին հայտնում է իրանական «aparat» գործակալությունը։

Նրա խոսքով՝ Իսրայելի էներգետիկ ներմուծումների զգալի մասը կապված է Կասպից ծովի տարածաշրջանի հետ, և այդ համատեքստում Ադրբեջանի գործոնի օգտագործումը կարող է ազդեցություն ունենալ Իսրայելի էներգետիկ անվտանգության վրա։ Մաջիդին նշել է նաև, որ Ադրբեջանը Իսրայելի համար ունի ռազմավարական նշանակություն և կարող է դիտարկվել որպես խոցելի ուղղություն։

Նույն քննարկման ընթացքում ռազմական վերլուծաբան Մոհամմադ Թահերին ընդգծել է, որ Իրանի համար ավելի արդյունավետ կարող է լինել հակառակորդի ռազմավարական շահերի վրա անսպասելի ազդեցության գործադրումը։ Նա նաև պնդել է, որ Ադրբեջանի տարածքը նախկինում օգտագործվել է Իսրայելի հետախուզական նպատակներով՝ ներկայացնելով օրինակներ սահմանային և օդային գործողությունների վերաբերյալ։

Վերլուծաբանների այս հայտարարությունները ներկայացվել են Իրանի լրատվական հարթակներում՝ որպես տարածաշրջանային անվտանգության շուրջ քննարկման մաս։