«Քաղաքացիական պայմանագիր» կուսակցությունն Արագածոտնի մարզում է

«Քաղաքացիական պայմանագիր» կուսակցությունը քարոզարշավի շրջանակներում  այցելել է  Արագածոտնի մարզ։ Բնակիչների հետ հանդիպման ժամանակ վարչապետ Փաշինյանը խոսել է համայնքում իրականացված ծրագրերի, առողջության ապահովագրության և կենսաթոշակների բարձրացման մասին։

Վարչապետը խոսել է մարզում կատարված աշխատանքների մասին՝ տեղեկացնելով, որ Ապարան խոշորացված համայնքում ՀՀ կառավարության և համայնքի համատեղ ջանքերով իրականացվել են շուրջ 2,4 միլիարդ դրամի սուբվենցիոն ծրագրեր։

Նիկոլ Փաշինյանը բնակիչների հետ զրուցել է նաև առողջության ապահովագրության համակարգի ներդրման և կենսաթոշակների բարձրացման շուրջ։ Նա ասել է, որ առողջության ապահովագրության ծրագրից արդեն օգտվում են 65 տարեկանից բարձր քաղաքացիները և մինչև 18 տարեկան երեխաները։

«2018 թվականին ես ասում էի, որ Հայաստանի Հանրապետության քաղաքացին հիվանդանոցի դռներին պետք է չմնա, և այսօր առողջության ապահովագրության համակարգի մեջ ներառված քաղաքացիներից որևէ մեկը հիվանդանոցի դռներին չի մնում»,-ընդգծել է վարչապետը։

Փաշինյանի խոսքով՝ ծրագիրը կարևոր է նաև ընտանիքների համար, քանի որ տարեց ծնողների առողջական խնդիրները մշտական անհանգստություն են առաջացնում քաղաքացիների մոտ։