ՔԿ-ն հերքում է Գագիկ Ծառուկյանի ձիերին առգրավելու մասին լուրերը

ՀՀ քննչական կոմիտեն հերքում է մամուլում և փաստաբանական շրջանակներում տարածված տեղեկատվությունն այն մասին, թե իրավապահները պատրաստվում են առգրավել և տեղափոխել «Բարգավաճ Հայաստան» կուսակցության առաջնորդ Գագիկ Ծառուկյանի առանձնատանը գտնվող ձիերին։

ՔԿ խոսնակ Կիմա Ավդալյանը հստակեցրել է, որ քրեական վարույթի շրջանակում կենդանիների նկատմամբ իրականացվել է միայն դատավարական գործողություն։

«Ընդամենն իրականացվել է ձիերի զննություն, ձիերի՝ տեղափոխելու հետ կապված տեղեկատվությունն իրականությանը չի համապատասխանում»,- նշել է ՔԿ խոսնակը։

Մինչդեռ Ծառուկյանի պաշտպանական կողմը հակառակն է պնդում։ Փաստաբան Հովհաննես Վարդանյանը լրագրողների հետ զրույցում հայտնել է, որ առգրավման որոշումը կայացվել է դեռևս հուլիսի 10-ին, սակայն գործողությունը տեխնիկական խնդիրների պատճառով հետաձգվել է։

Ըստ փաստաբանի՝ իրենց համար անհասկանալի պատճառներով ձիերի առգրավումն այսօր նույնպես չի իրականացվել։ Պաշտպանական կողմն արդեն բողոքարկում է քննիչի որոշումը՝ շեշտելով, որ կենդանիներն ընտանի են և չեն կարող հանդիսանալ քրեական վարույթի առարկա։