Կձևավորվի աշխատանքային խումբ, որի նպատակն է գարնանային վարարումների ռիսկերի գնահատումը

ՆԳՆ փրկարար ծառայությունից տեղեկացնում են, որ ծառայությունում տեղի է ունեցել աշխատանքային հանդիպում, որի  ընթացքում ներկայացվել են առատ տեղումների հետևանքով մայրաքաղաքին հարող գետերում, ջրամբարներում և ջրահեռացման համակարգերում առկա իրավիճակը և վարարումների հնարավոր ռիսկերը։

Փրկարարական ծառայողները ներկայացրել են իրականացված իրազեկման միջոցառումները, գետերի հուների մշտադիտարկումները։ Նշվել է, որ առաջիկա օրերին ինտենսիվ տեղումներ չեն սպասվում, սակայն դեռևս առկա ձնածածկույթի ծավալը և ջերմաստիճանային փոփոխությունները կարող են հանգեցնել ջրի հոսքերի ավելացման։ 

Քննարկվել են նաև ջրահեռացման համակարգերի, գետերի հուների մաքրման, ինչպես նաև փակ և թունելային հատվածների թողունակության վերաբերյալ հարցեր։ 

Մաքրման աշխատանքներ են իրականացվում Գետառ և Ողջաբերդ գետերի հատվածներում։ Նախատեսվում է աշխատանքներ իրականացնել նաև Հրազդան գետի տարբեր հատվածներում՝ ջրահոսքերի անխոչընդոտ անցանելիությունն ապահովելու նպատակով։

Պայմանավորվածություն է ձեռք բերվել ընթացիկ աշխատանքներն առավել արդյունավետ համակարգելու և կանխարգելիչ միջոցառումներ իրականացնելու նպատակով ձևավորել միջգերատեսչական աշխատանքային խումբ։