Կհատկացվի 13 միլիարդ դրամ հանրապետության ճանապարհների վերանորոգման, հիմնանորոգման ու միջին նորոգման համար

Կառավարությունը նախատեսում է հատկացնել 13 միլիարդ դրամ   հանրապետության ճանապարհների վերանորոգման, հիմնանորոգման ու միջին նորոգման համար: Որոշումը կայացվել է կառավարության հերթական նիստում:

Տարածքային կառավարման և ենթակառուցվածքների նախարար Դավիթ Խուդաթյանը տեղեկացրել է, որ խոսքը 58 կիլոմետրի մասին է, որից միջպետական նշանակության՝ 1 կիլոմետր, հանրապետական՝ 27 կմ, մարզային 30 կմ: Նախագծում կան նաև երեք տրանսպորտային հանգույց:

 Վարչապետ Փաշինյանի տեղեկացմամբ էլ  նախատեսվում է հիմնանորոգել Գյումրիից դեպի պետական սահման ավտոճանապարհը, Վերին Պտղնու տրանսպորտային հանգույցից դեպի Բալահովիտ ու Աբովյան տանող, Երևան-Գառնի ավտոճանապարհի 16,7 կմ, Վեդի բնակավայրով անցնող ավտոճանապարհի 3,8 կմ, Արմավիրի մարզում Նորապատից դեպի Վարդանաշեն տանող 10 կմ, Սևանից դեպի Ծաղկունք ու Զովաբեր 17,2 կմ երկարությամբ ճանապարհահատվածները և այլն։