Խորվաթիայի վարչապետ Անդրեյ Պլենկովիչը խոսել է Հայաստանի համար գագաթնաժողովի նշանակության մասին

Խորվաթիայի վարչապետ Անդրեյ Պլենկովիչը Եվրոպական քաղաքական համայնքի գագաթնաժողովից առաջ ճեպազրույցի ընթացքում խոսել է  Հայաստանի համար գագաթնաժողովի նշանակությանը մասին՝ շեշտելով դրա քաղաքական և տնտեսական կարևորությունը։

«Ես կարծում եմ, որ սա շատ ուժեղ ազդակ է Հայաստանի համար։ Այն փաստը, որ Եվրոպական քաղաքական համայնքի գագաթնաժողովն  անցկացվում է Երևանում, կարևոր ազդակ է։ Հայաստան-ԵՄ գագաթնաժողովը նույնպես կարևոր ազդակ է Հայաստանի համար»,-ասել է Անդրեյ Պլենկովիչը:

Խորվաթիայի վարչապետը անդրադարձել է տարածաշրջանային կապակցվածությանը և ասել է, որ տրանսպորտային և էներգետիկ միջանցքները կարևոր դեր ունեն ոչ միայն Եվրոպայի, այլև Հարավային Կովկասի երկրների զարգացման և խաղաղության ապահովման գործում։

«Ես կարծում եմ, որ էներգակիրների և ապրանքների տեղափոխումը, բաց տարանցումը, համապատասխան ենթակառուցվածքներում ներդրումները չափազանց կարևոր են Եվրոպայի այս հատվածի, ինչպես նաև Կովկասում գտնվող բոլոր պետությունների զարգացման և խաղաղության համար»,– նշել է նա։