Խոտ-Որոտան ճանապարհին, որտեղ փլուզման, ջրի որոշ խնդիրներ ունեինք, աշխատանքն ամբողջությամբ ավարտել ենք. ՏԿԵ նախարար

ԱԺ տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստում՝ «ՀՀ 2025 թվականի պետական բյուջեի կատարման մասին» տարեկան հաշվետվության նախնական քննարկումներին, ՔՊ խմբակցության պատգամավոր Դավիթ Դանիելյանը հարց տվեց ՏԿԵ նախարար Դավիթ Խուդաթյանին՝ հետաքրքրվելով Կապան, Արծվանիկ, Շուռնուխ ճանապարհով, որը, ըստ պատգամավորի, որոշ տեղերում բավականին վնասված է ու երթևեկության համար խոչընդոտներ է ստեղծում:

Խուդաթյանի խոսքով՝ ճանապարհն իրենց ուշադրության կենտրոնում է:

«Պիտի ասեմ, որ մենք արդեն շուրջ 350 կմ ճանապարհի մասով 2026 թվականին ունենք կնքված պայմանագրեր, ևս 150 կմ-ին հիմնականում միջին նորոգման աշխատանքների մասով այս պահին աշխատանքներ են իրականացվում չափագրման և մրցույթների հայտարարման մասով: Այդ ճանապարհի որոշ հատվածներ ընդգրկված են 2026 թվականի մեր ծրագրում, բայց կոնկրետ որ հատվածներն են, դրա մասով լրացուցիչ տեղեկություն փոխանցելու անհրաժեշտություն լինի, սիրով կփոխանցեմ»,- ասել է նախարարը:

Պատգամավոր Դանիելյանի հարցին՝ ինչ ծրագրեր կան Խոտ-Որոտան-Շուռնուխ ճանապարհահատվածի վերաբերյալ, որը վնասված է, Խուդաթյանը նշեց, որ նախորդ տարվա ընթացքում ավարտել են Խոտ-Որոտան ճանապարհը, որը վերջին տարիներին իրականացված ամենախոշոր ծրագրերից մեկն է:

«Արժեքը կազմել է մոտավորապես 4 միլիարդ դրամ: Ձեր ասած շարունակությունը՝ Խոտ-Որոտանից դեպի Շուռնուխ, մեր դիտարկվող ճանապարհների ցանկում է: Կարծում եմ՝ 2026-ի ընթացքում, ըստ անհրաժեշտության, նախագծանախահաշվային փաստաթղթերի ձեռքբերումով կզբաղվենք, և, մեծ հավանականությամբ՝ արդեն 2027-ին կառուցվող ու հիմնանորոգվող աշխատանքների ցանկում կլինի»,- ասաց ՏԿԵ նախարարը: