Խստացվել է շինհրապարակների կահավորման և կազմակերպման նորմերը

Դեռևս ամիսներ առաջ խստացրինք շինհրապարակների կահավորման և կազմակերպման նորմերը: Մայիսի 1-ից այդ նորմերն արդեն մտել են կիրառության մեջ: Այս մասին Ազգային ժողովի տնտեսական հարցերի ու ֆինանսավարկային և բյուջետային հարցերի մշտական հանձնաժողովների հունիսի 11–ի համատեղ նիստում՝ «ՀՀ 2025 թվականի պետական բյուջեի կատարման մասին» տարեկան հաշվետվության նախնական քննարկումների ընթացքում, ասել է Քաղաքաշինության կոմիտեի նախագահ Եղիազար Վարդանյանը՝ պատասխանելով ՔՊ խմբակցության պատգամավոր Սերգեյ Բագրատյանի հարցին, որը վերաբերում էր հանրության դժգոհությանը նորակառույց բազմահարկերի առաջացրած փոշու, աղտոտվածության նկատմամբ:

«Մենք ողջամիտ՝ եթե չեմ սխալվում՝ 3-4 ամիս ժամկետ տրամադրեցինք, որպեսզի գործող կառուցապատողները կարողանան այդ շինհրապարակները նորմի պահանջներին համապատասխան կահավորեն անհրաժեշտ սարք-սարքավորումներով:

Դրանց մեջ մտնում են փոշեճնշիչ միջոցները, ջրային մառախուղ իրականացնող սարքավորումների տեղադրումը, նաև պահանջներ, թե շինհրապարակում գոյություն ունեցող հողային մակերեսները պետք է ամբողջությամբ պատված լինեն քարային պատվածքներով, այսպես կոչված՝ շեբենապատված լինեն, իսկ էն հատվածները, որոնցով երթևեկություն է տեղի ունենում շինհրապարակի սահմաններում, պետք է կոշտ ծածկույթ ունենան, օրինակ՝ բետոնապատված լինեն»,- նշել է Վարդանյանը:

Կոմիտեի նախագահի խոսքով՝ իրականացվել են մի շարք խստացումներ, որոնց մասին առաջիկա օրերին բոլոր կառուցապատողները դարձյալ կիրազեկվեն:

Սերգեյ Բագրատյանի հարցին, թե արդյոք հնարավոր է ժամային սահմանափակումներ սահմանել շինաշխատանքների իրականացման համար, վերջինս հայտնել է, որ ՀՀ վարչապետի հանձնարարությամբ փոխվարչապետ Տիգրան Խաչատրյանի գլխավորությամբ Կառավարությունում ձևավորվել է գիջգերատեսչական աշխատանքային խումբ, և մի շարք միջոցառումներ արդեն իսկ քննարկվել և մշակվել են, այդ թվում՝ Երևանում գծային ենթակառուցվածքների, շինարարության տևողությունների և ժամային կարգավորումների վերաբերյալ:

«Նպատակն այն է, որ մենք սահմանափակենք շինարարության տևողությունը»,- ասել է Քաղաքաշինության կոմիտեի նախագահը։