Լրացուցիչ հնարավորություններ ներդրումային ֆոնդերի և հայաստանյան ընկերությունների համար

Հայաստանում ոչ հրապարակային ներդրումային ֆոնդերի մասնակիցների առավելագույն թիվը ներկայիս 49-ի փոխարեն առաջարկվում է սահմանել 99: Ազգային ժողովի հունիսի 18-ի նիստում այս մասին հայտարարել է ՀՀ էկոնոմիկայի նախարարի տեղակալ Լիլյա Սիրականյանը:

Խորհրդարանն առաջին ընթերցմամբ քննարկել է ««Ներդրումային ֆոնդերի մասին» օրենքում փոփոխություն կատարելու մասին» օրենքի նախագիծը:

Ըստ հիմնավորման՝ նախագծի ընդունմամբ նոր և ավելի լայն հնարավորություններ կստեղծվեն ինչպես Հայաստանում գործող ներդրումային ֆոնդերում, այնպես էլ, որպես հետևանք, հայաստանյան այլ ընկերություններում լրացուցիչ ներդրումներ ներգրավելու համար:

Գլխադասային՝ ԱԺ տնտեսական հարցերի մշտական հանձնաժողովի դրական եզրակացությունը նիստի ընթացքում ներկայացրել է հանձնաժողովի անդամ Նարեկ Ղահրամանյանը։ Նա գործընկերներին կոչ է արել կողմ քվեարկել ներկայացված օրենսդրական փոփոխությանը: