Մ-17 ԱԱ Բաքվում. Արարատ Ավետիսյանը բրոնզե մեդալի գոտեմարտ կանցկացնի

Բաքվում անցկացվող հունահռոմեական ոճի ըմբշամարտի մինչեւ 17 տարեկանների աշխարհի առաջնությունում Եվրոպայի Մ-17 առաջնության բրոնզե մեդալակիր, Հայաստանի ներկայացուցիչ Արարատ Ավետիսյանը (48 կգ) պարտվեց կիսաեզրափակիչում եւ կպայքարի բրոնզե մեդալի համար:

Արարատ Ավետիսյանը գոտեմարտեց Ղազախստանի ներկայացուցիչ Ալի Ալմասի հետ եւ պարտվեց 1:4 հաշվով:

Առաջին մրցափուլում գորգի մրցավարը պասիվություն տվեց ղազախ ըմբիշին, եւ վերեւից աշխատելու հնարավորություն ստացավ Արարատ Ավետիսյանը, բայց հայ ըմբիշը չկարողացավ գլորել մրցակցին:

Երկրորդ մրցափուլում պասիվություն ստացավ Ավետիսյանը, Ալի Ալմասին հաջողվեց գլորել հայ ըմբիշին եւ 3 միավորի առավելություն ստացավ: Գոտեմարտի ավարտին, Ալի Ալմասը պարբերաբար քաշում էր Արարատ Ավետիսյանի մարզահագուստից: Հայաստանի անկյունը չելենջ գցեց, բայց կողային մրցավարները չբավարարեցին եւ եւս մեկ միավոր տվեցին Ալի Ալմասին: Մինչեւ գոտեմարտի ավարտը Արարատ Ավետիսյանին չհաջողվեց միավոր վաստակել:

Հուլիսի 28-ին Արարատ Ավետիսյանը բրոնզե մեդալի գոտեմարտ կանցկացնի: