Մեծամորի ատոմակայանում իրականացվում են շահագործման ժամկետի երկարացման ծրագրով նախատեսված միջոցառումներ:

Մեծամորի ատոմակայանում այս պահին իրականացվում են շահագործման ժամկետի երկարացման ծրագրով նախատեսված միջոցառումներ։ Այս մասին հայտնել է ՀՀ տարածքային կառավարման և ենթակառուցվածքների նախարար Դավիթ Խուդաթյանը՝ «Արմենպրես»-ի հետ զրույցում:

«Այս պահին ատոմակայանն անջատված է Հայաստանի էներգետիկ համակարգից, ինչը նշանակում է, որ այնտեղ իրականացվում են շահագործման ժամկետի երկարացման ծրագրով նախատեսված միջոցառումներ։ Նախատեսված դադարը կտևի մոտ հինգ ամիս։ Սա շահագործման ժամկետի երկարացման ամենաերկար ծրագիրն է։ Մենք սովորաբար մեկ ամսից մինչև քառասուն օր տևողությամբ ենք յուրաքանչյուր տարի ատոմակայանը տանում միջոցառումների ծրագրի՝ անջատելով ընդհանուր էներգետիկ համակարգից։ Հնգամսյա ծրագիրն ընթանում է բնականոն հունով, որի ավարտից հետո ատոմակայանի շահագործման ժամկետը կերկարացվի։ Մեր պատկերացումներն այնպիսին են, որ մենք Մեծամորի ատոմակայանն էներգետիկ համակարգում պետք է պահենք այնքան ժամանակ, քանի դեռ նոր ատոմակայանի կառուցումն ավարտված չէ»,- ասել է ՏԿԵ նախարարը։

Զրույցի ընթացքում անդրադարձ է կատարվել նաև նոր ատոմակայանի կառուցմանը և Դավիթ Խուդաթյանն ընդգծել է, որ ՀՀ կառավարությունը հայտարարել է, որ գնում է փոքր մոդուլյար ատոմակայանների կառուցման ճանապարհով։ Իսկ թե ո՞ր երկրի հետ է պատրաստվում համագործակցել Հայաստանը ՌԴ-ի՞, թե՞ ԱՄՆ-ի, նախարարն ընդգծել է, որ դա կախված կլինի այն մոդելից, որը կընտրի ՀՀ կառավարությունը։

Ի դեպ, այս առումով Հայաստանն առաջարկներ ունի ոչ միայն ՌԴ-ից և ԱՄՆ-ից, այլ նաև Չինաստանից, Կորեայից, Ֆրանսիայից։