Մեղրիում կասեցվել է զովացուցիչ ըմպելիքի արտադրամասի գործունեությունը

Սննդամթերքի անվտանգության տեսչական մարմնի (ՍԱՏՄ) տեսուչները Սյունիքի մարզի Մեղրի քաղաքում ստուգումներ են իրականացրել անհատ ձեռնարկատեր Արմեն Ավագյանին պատկանող «Մեղրու զովացուցիչ ըմպելիք» արտադրամասում։

Ստուգումների ընթացքում արձանագրվել են սանիտարահիգիենիկ լուրջ խախտումներ․

• Արտադրական տարածքները չեն ապահովել պատշաճ մաքրում, ախտահանում և պաշտպանություն կենդանիներից, կրծողներից ու միջատներից։

• Հատակները, դռները, պատերը և առաստաղները չեն համապատասխանել սահմանված պահանջներին (առկա է եղել կեղտի, բորբոսի կուտակման և խոնավության վտանգ)։

• Բացակայել է անձնակազմի հանդերձարանը։

Խախտումների պատճառով արտադրամասի գործունեությունը կասեցվել է։ Տնտեսվարողին հանձնարարվել է սահմանված վերջնաժամկետում վերացնել թերությունները և տարածքը համապատասխանեցնել սննդամթերքի անվտանգության նորմերին։