Մենակ եմ որոշել, որ տանեմ մամային թաղեմ․20-ամյա տղան պատմել է՝ ինչպես է գրտնակով կյանքից զրկել մորը

20-ամյա տղան մորը գրտնակով կյանքից զրկել է, քանի որ մայրը ծխախոտ օգտագործելու համար ծեծել է նրան։ Այս մասին «Ժողովուրդ»-ի հետ զրույցում հայտնել է նա։

««Վիպ» տեսակի ծխախոտ էի ծխել։ Մամաս չէր ուզում, որ ծխեի։ Եկա տուն, մամաս ասաց՝ «Ծխել ես»։ Ասեցի՝ «Չէ, չեմ ծխել»։ Ասաց՝ «Հո արա»։ Արտաշնչեցի, զգաց, որ ծխել եմ, այդպես վիճեցինք։ Մաման վրես բարկացավ, ծեծեց»,- նշել է նա։

Նրա խոսքով՝ մայրը մտել է սենյակ, հետո վերցրել է վառարանի շիշը և երեք անգամ հարվածել իրեն, իսկ ինքը դուրս է փախել։

«Երկու րոպե հետո միջանցքում ալյուրի մեշոկի մեջ գրտնակ կար։ Վերցրեցի, եկա ննջասենյակ։ Մամաս պառկած էր։ Հինգից վեց անգամ խփեցի գլխին։ Մենակ եմ որոշել, որ տանեմ մամային թաղեմ, ոչ ոք չի եղել»։

20-ամյա Էդիկը առողջական խնդիրներ ունի։ Ինչպես ինքն է խոստովանում, դեղերը ժամանակին չի խմել և չի գիտակցել, թե ինչ է արել։

«Արյունը տվեց գլխիս, չհասկացա՝ ինչ եմ արել, բայց հետո հասկացա, թե ինչ եմ արել։ Զղջում եմ արածիս համար»,- նշել է Էդիկը։

Հիշեցնենք, որ Արագածոտնի մարզի Մելիքգյուղում 25 և 20 տարեկան եղբայրները ձերբակալվել են իրենց 56-ամյա մորը սպանելու և դին թաքցնելու կասկածանքով, հայտնում են ՆԳՆ ոստիկանությունից։

ՆԳՆ հաղորդագրության մեջ նշվում է, որ 1970-ին ծնված Ռ․Մ․-ի անհետ կորելու մասին հաղորդումը ստացվել է հուլիսի 22-ին, մինչդեռ դեպքը տեղի է ունեցել մարտին։

«Հանցագործությունը քողարկելու և հետքերը վերացնելու նպատակով դիակը նրանք տեղափոխել են Մելիքգյուղի իրենց բնակարանի հարևանությամբ գտնվող կիսակառույց շինություն և թաքցրել հողաշերտի տակ։

Հուլիսի 22-ին եղբայրները հայտնաբերվել, ձերբակալվել և տեղափոխվել են Քրեական ոստիկանության Արագածոտնի մարզային վարչություն, որտեղ նրանցից մեկը խոստովանել է կատարվածը։

Երիտասարդները և կազմված փաստաթղթերն ուղարկվել նախաքննական մարմին»,- հայտնում են ՆԳՆ-ից։