Մոսկվայում չեն հասկանում՝ ինչու Երևանը չի շտապում հանրաքվե անցկացնել․ Գալուզին

ԵԱՏՄ անդամ երկրների համար «անընդունելի է այն իրավիճակը», երբ Հայաստանը իր օրենսդրությամբ ամրագրում է Եվրամիությանը անդամակցելու մտադրությունը՝ միաժամանակ շարունակելով օգտվել Եվրասիական տնտեսական միության անդամակցության բոլոր առավելություններից և արտոնություններից, ուստի Մոսկվայում «լիովին չեն հասկանում», թե ինչու Հայաստանի ղեկավարությունը չի շտապում անցկացնել հանրաքվե՝ այդ միավորումներին անդամակցության հարցով։ Այս մասին RTVI-ին տված հարցազրույցում ասել է ՌԴ փոխարտգործնախարար Միխայիլ Գալուզինը։

«Ինչպես գիտեք, Եվրասիական տնտեսական միության անդամ երկրների՝ մասնավորապես Ռուսաստանի, Ղազախստանի, Ղրղզստանի և Բելառուսի տնտեսական անվտանգության համար հնարավոր ռիսկերի վերաբերյալ մտահոգություններն արտահայտել են նշված չորս պետությունների ղեկավարները մայիսի 29-ին Աստանայում կայացած Եվրասիական բարձրագույն տնտեսական խորհրդի նիստի ընթացքում։ Մինչև դեկտեմբեր փորձագետները կուսումնասիրեն ինչպես տնտեսական, այնպես էլ իրավական բոլոր ասպեկտները՝ կապված Հայաստանի՝ ԵԱՏՄ-ում իր մասնակցության հնարավոր կասեցման հետևանքների հետ»,–ասել է Գալուզինը։