Նախագահ Վահագն Խաչատուրյանն ընդունել է ԵԱՀԿ/ԺՀՄԻԳ դիտորդական առաքելության ղեկավար Յանեժ Լենարչիչին
Վահագն Խաչատուրյանը ԵԱՀԿ/ԺՀՄԻԳ դիտորդական առաքելության ղեկավարի հետ քննարկել է ընտրական գործընթացների վերահսկողությունն ու ժողովրդավարական ինստիտուտների ամրապնդումը։
Հանրապետության նախագահ Վահագն Խաչատուրյանն ընդունել է Հայաստանում ԵԱՀԿ Ժողովրդավարական հաստատությունների և մարդու իրավունքների գրասենյակի (ԺՀՄԻԳ) դիտորդական առաքելության ղեկավար Յանեժ Լենարչիչին, այս մասին հայտնում է ՀՀ նախագահի մամլո ծառայությունը:
Ողջունելով հյուրին՝ նախագահ Խաչատուրյանը շնորհակալություն է հայտնել առաքելության բազմամյա գործունեության համար՝ ընդգծելով դրա կարևոր դերը Հայաստանի ժողովրդավարական ինստիտուտների կայացման գործում։
«Դուք կարևորագույն առաքելությամբ եք հիմա Հայաստանի Հանրապետությունում։ Կարող եմ ասել, որ մեր ժողովրդավարական ինստիտուտների կայացման, հատկապես՝ ընտրական ինստիտուտի ձևավորման գործում, ԵԱՀԿ/ԺՀՄԻԳ-ի դերը շատ զգալի և կարևոր է։ Վստահ եմ, որ այս անգամ ևս ձեր աջակցությամբ, օգնությամբ և մեթոդաբանության կիրառմամբ մենք կանցկացնենք ժողովրդավարական, ազատ և թափանցիկ ընտրություններ։ Այս ամենի արդյունքում ամենակարևորն այն է, որ ժողովուրդը վստահ լինի, որ իր ձայնն իսկապես տեղ է հասել»,- նշել է նախագահը։
Յանեժ Լենարչիչը, շնորհակալություն հայտնելով ընդունելության համար, հիշեցրել է, որ ԵԱՀԿ/ԺՀՄԻԳ-ի առաջին դիտորդական առաքելությունը Հայաստանում իրականացվել է դեռևս 1996 թվականին, իսկ ներկայիս առաքելությունը 30-րդն է։
«Հայաստանը շատ լավ աշխատանք է կատարել այս տարիների ընթացքում, և ես մանրամասների մեջ շատ չեմ մտնի, քանի որ դուք ինքներդ ամեն ինչ շատ լավ գիտեք»,- ասել է Լենարչիչը։
Հանդիպման ընթացքում քննարկվել են առաքելության գործունեության հիմնական ուղղություններն ու ընտրական գործընթացների վերահսկողությանը վերաբերող հարցեր։ Կողմերը կարևորել են ընտրությունների նկատմամբ հետևողական մշտադիտարկումը՝ այն դիտարկելով որպես ընտրական գործընթացների որակի բարձրացման և հնարավոր խախտումների կանխարգելման կարևոր գործոն։
Անդրադարձ է կատարվել նաև նախընտրական շրջանում երկրում առկա հասարակական-քաղաքական մթնոլորտին։ Նախագահ Խաչատուրյանը և Յանեժ Լենարչիչը շեշտել են քաղաքական հանդուրժողականության և պատասխանատու նախընտրական քարոզչության կարևորությունը՝ ընդգծելով, որ դա ժողովրդավարական կայունության կարևոր նախապայման է։
Հանդիպման ավարտին վերահաստատվել է համագործակցությունը շարունակելու պատրաստակամությունը՝ Հայաստանում ընտրական համակարգի կատարելագործման և ժողովրդավարական արժեքների ամրապնդման նպատակով։
Կարդացեք նաև
Հայաստան11 մայիսի 2026
ԱԺ-ն ընդունել է կենսաչափական նոր համակարգի ներդրման մասին օրենքը
ԱԺ-ն ընդունել է կենսաչափական նոր համակարգի ներդրման նախագիծը, որը նախատեսում է պարտադիր ID քարտեր և միտված է նաև ԵՄ-ի հետ վիզաների ազատականացման գործընթացին։
Հայաստան11 մայիսի 2026
«Արտաշատ» - «Լեգենդներ». Արտաշատի մարզադաշտի երկրորդ կյանքը
Արտաշատում տեղի է ունեցել Արտաշատի քաղաքային մարզադաշտի վերաբացումը՝ հիմնանորոգումից հետո, որը վերածվել է մարզական մեծ տոնի։ Միջոցառման շրջանակում կայացել է «Արտաշատ»–«Լեգենդներ» հանդիպումը, որտեղ մասնակցել են հայկական ֆուտբոլի հայտնի խաղացողներ։
Հայաստան11 մայիսի 2026
Փաշինյան․ «Ես նախապես տեղեկացրել եմ, որ մայիսի 28-ին ԵԱՏՄ նիստին չեմ մասնակցի»
Վարչապետը հայտարարել է, որ մայիսի 28-ին չի մասնակցի Եվրասիական տնտեսական միություն նիստին՝ նախապես տեղեկացնելով գործընկերներին։ Նա նշել է, որ Հայաստանը միաժամանակ տարբեր միջազգային հարթակների անդամ է և վարում է իր օրակարգը՝ շեշտելով, որ փոքր պետությունը չի կարող ներգրավվել բոլոր գլոբալ գործընթացներում։