Ուրսուլա ֆոն դեր Լայենը հաջորդ շաբաթ կժամանի Հայաստան. Նիկոլ Փաշինյանը մանրամասներ է հայտնել

Եվրոպական հանձնաժողովի նախագահ Ուրսուլա ֆոն դեր Լայենը պատրաստվում է հաջորդ շաբաթ այցելել Հայաստան։ Այս մասին լրագրողների հետ զրույցում հայտնեց ՀՀ վարչապետ Նիկոլ Փաշինյանը։

Ըստ կառավարության ղեկավարի՝ բարձրաստիճան պաշտոնյայի երևանյան այցի շրջանակներում քննարկվելու է Հայաստանի տնտեսության համար ռազմավարական նշանակություն ունեցող հարց։

«Նրա այցի օրակարգային հարցերից մեկը լինելու է գյուղատնտեսական արտադրանքի հեշտացված մուտքը Եվրոպական Միություն ապահովելու հնարավորությունը»,- ընդգծեց վարչապետը։

Նիկոլ Փաշինյանը նաև հավելեց, որ մեծ հավանականություն կա, որ հենց Ուրսուլա ֆոն դեր Լայենի այցի ընթացքում Երևանում պաշտոնապես կհայտարարվի հայկական գյուղմթերքի համար եվրոպական շուկայի դյուրացման գործընթացի մեկնարկի կամ համապատասխան որոշման մասին։